بطانية النجاة couverture de survie

بالنسبة لناس لي كيخرجو للطبيعة (randonnée – trek)  مهم يكون عندكم فصاككم غطاء الإنقاذ ( couverture de survie)  بطانية النجاة، كاشة دالعتيق ، ليزار دلأليمينيوم هههه… المهم سميوها لي بغيتيو ، حجمها صغير و زنها لا يتعدى 300 غرام، و ثمنها رخيص ( متفوتش 50 درهم)  و فوائدها و استعمالاتها كثيييرة و مهمة، فهاذ المقال انهضر ليكم على فاش نقدرو نستعملوها، قراو تال الأخير :).

هاذ اللعيبة معروفة عند الجميع أنها كتحافظ على درجة حرارة الجسم من الضياع ، و فنفس الوقت كتحميك من درجة الحرارة المرتفعة، بإختصار عازل حراري ، و لكن فالحقيقة نقدرو نستعملوها فمسائل أخرى.

جل هاذ الأغطية كيكون عندهم زوج وجوه، واحد فالغالب ذهبي و الأخر أبيض أو فضي، ملي كتبغي تخبى من البرد الجهة المذهبة كتكون من الذاخل و ملي كتبغي تخبى من الحرارة العكس.

#1 إلى شي واحد جاتو hypothermie( نزلات ليه درجة حرارة الجسم نقدرو نغطيوه بها اتنفعو بزااف.

#2 إلى عندك sac de couchage على قد الحال و مكانش كافي انو يحميك من البرد تقدر تغشيه بها من برا. غير رد بالك متغطيش بها راسك ، راك تخنق.

#3 الى كنتي عرقان متلويهاش عليك ايرجع عليك العرق و اتمرض.

#4 الى مكانش عندك السروال امبرميابل و بغيتي تجلس فالثلج حطها و جلس عليها حيت مكدوزش الما و البرودة ديال الثلج، و كذلك تقدر تحطها تحث الطابي باش متوصلكش البرودة

#5 الى كان المطر تقدر تخبع تحتها او تحطها فوق الخيمة باش متفزگش.

#6 الى كان البرق و الرعد (عواصف) او فجنب شي مصدر ديال شي تيار كهربائي متستعملهاش حيت المكونات ديالها معدنية و موصلة للكهرباء ( هاد المسألة فيها نقاش) .

#7تقدر تستعملها كواقي من العجاجة ( الرياح القوية)

#8 تقدر تجمع بيها الماء وقت المطر.  تحفر حفرة و تغلف لداخل دالحفرة بها و تخليها يتجمع فيها الماء

#9الى كنتي فحالة خطر تقدر تستعملها لإثارة الإنتباه من بعيد بالجهة الذهبية ديالها لي كتعكس أشعة الشمس

#10 الى كنتي هاز 2 او 3 تقدر تستعملهم كنقالة للمريض لأنها متيينة.

قبل متخرج ف randonnée تأكد أنها فوضعية جيدة ، حيث كاينين لي جوطابل و كاينين لي كيتستعملو عدة مرات.