Comment choisir mes lunettes de randonnée -كيف أختار نظاراتي الجبلية

بزاف منا فوقت البرد و الثلج مشاو للمناطق الجبلية باش يستمتعوا بالمناظر الخلابة لي كتكون فهاذ الفترات من السنة، و كاين منا لي هوايته التسلق ( alpinisme) و صعود القمم ففصل الشتاء، و بزاف منا ملي رجع عينيه بقاو كيحرقوه و حمارو ليه، و هذا بسبب أشعة الشمس لي تعرض ليها.

باش نفهمو مزيان اش كيوقع، ناخدو فكرة على هاذ أشعة الشمس.

الشمس فيها العديد من الأشعة ، كتحت الحمراء و السينية و كاما و الفوق بنفسجية ووو… و لكن ماشي كلها كتوصل لينا, حنا لي كيهمنا هي الأشعة الفوق البنفسيجة UV.

هاذ UV كتقسم لثلاتة أصناف:

UV-A: تأثيرها منخفظ.

UV-B: تأثيرها خطير.

UV-C: هذي أكثر خطورة و لكن الحمد لله طبقة الأوزون كتحبسها من المرور للأرض, و لكن كاين بعض المصادر الإصطناعية لي كتبعتها.

هاذ الأشعة إلى تعرضنا ليهم لمدة طويلة كيسببو أضرار كبييييرة للعين و لجلد, يقدرو يوصلونا للعمى.

لهذا ملي نبغيو نديرو شي بلان ديال شي سيركوي فالطبيعة ( randonnée -trek) متنساوش عويناتكم و ديو معاكم نظارات لي أيوفروا ليكم حماية من أضرار UV.

هاد الأشعة القوة ديالها كتزاد بإختلاف المناخ, مثلا:

جبل : كلما طلعنا 300 متر القوة ديال UV كتزاد ب 4% و إلى كان الثلج كتزاد ب 70%.

الصحراء او البحر : كتزاد ب 30%. و كلما كان الجو حار و جاف كلما ازدادت قوتها.

إذن ملي تبغيو تاخدو نظارات مزيانين تبعو هدشي :

# نظارات الوقاية كيتصنفو ب les classes كاين classe 1/2/3/4 و لأفظل حماية خودو كلاص 4 لي كيوفرو حماية قوية فجميع الظروف المناخية( ممنوع استعمالهم أثناء السياقة) .

# تفداو تاخدو ديال زجاج حيث فالغونذوني يمكن يتهرسو فأيتها لحظة.

# خودوهم يكونو لاصقين على الوجه و يكون مكيدخلوش الأشعة من الجنب mode sport .

هادو أهم الخواص لي كنعتمدو عليهم، الثمن كيتعدى 250 درهم، و لكن راه ايحميو ليك عينيك لي إلى مرضو ليك اتخسر عليهم فلوس صحيحة و ياربي يتعالجوا.

الله يحفظكم من كل سوء ، و نتمنا تكونوا استفدتوا من هاد المقال.

كتابة : لمين عزالدين @lamine.azzeddine ( متسلق هاوي و مدون )