گاع الناس لي طلعو لقمة توبقال ( toubkal ) أو لي مزال مطلعوش الحلم ديالهم يتصورو مع ديك الحديدة كما الأغلبية كتسميها، ذاك الهرم لي كيتعتبر منبع السعادة، ملي كتوصل ليه كيمشي العياء و التعب و كيتخلطو عليك المشاعر ديال الفرحة و تحقيق الهذف.
فسنة 1930 قام اليوطنو الفرنسي GEOVAERS ببناء الهرم الحديدي لي كاين فقمة توبقال ( toubkal ), ملي إكتشفوا أن قمة توبقال ( toubkal ) هي الأعلى فالأطلس الكبير و فالمغرب عموما، من بعد ما كانوا كيعتبروا قمة جبل العياشي 3757 متر هي أعلى قمة فالمغرب.
البناء ديالو مكانش باش يعلمو الصومي، أو باش يبقاو ياخدو صور تذكارية، بل كان علمي و ذاخل فإطار تأسيس البنية التحتية للمغرب.
كفاش هاذ لبلان ؟
باش بعدا يبنيو داك الهرم فأعلى نقطة فشمال إفريقيا ، مكانش الأمر سهل ، فالمهمة نفذها أكثر من أربعين رجل من سكان المنطقة، لي نقلو الحديد و السيما و معدات أخرى, والغرض هنا هو بناء نقطة جيوديزية (point géodésique) في أعلى قمة في المغرب ( toubkal ).
شنو هو هاذ لبلان و لاش صالح؟؟؟!!!!
نقطة جيوديزية ( ملقيتش شي ترجمة من غير هذي) أنحاول نبسط المفهوم ديالها و انعتبروها نقطة مرجعية كنعتمدو عليها باش نحددو إحداثيات واحد المكان معين, و هاذ النقط مهمين جدا لأننا كنعتمدو على التموضع ديالهم فبناء مثلا الطرقات، أو رسم خرائط البلد، إستعمالات عسكرية، و كذلك في رصد الزلازل، و إستعمالات أخرى.
و البناء ديالهم فيه زوج أجزاء.
√√√ جزء الخارجي يمكن يكون هرم بحال لي ققمة توبقال ( toubkal ) لي كنتعلقو فيه ( و مخصناش نبقاو نتعلقو فيه ) كيتعتبر رباعي الأرجل، و ممكن يكون ثلاتي أو ثنائي أو أحادي الأرجل ( جعبة خارجة من الأرض), و خاصو يكون دائما تابث فواحد القياسات لي مضبوطة، و ملي كيتغيرو هاد القياسات إما بسبب زلزال أو ريح جد قوية أو شي إنسان بقا كيتعلق فيه و يطلع عليه، فهنا كيتخربقو الحسابات، و كيضطرو أنهم يطلعو يقادوه من جديد, و هاذ المسألة وقعات فالهرم ديال توبقال عديد من المرات بسبب الناس لي كيطلعو يتصورو فوق منو، و هذا راجع أن الناس معرفينش.
√√√ جزء داخلي وكيكون محفور مباشرة تحت ديك العلامة(الهرم مثلا ديال توبقال)، وفي عمق يقدر يوصل لمترو ونص ، تنلاقاو معلم غالبا تيكون من النحاس و داير عليه الرملة والرماد, المختصين تيستعملو معدات تقنية خاصة مثل الجي بي آس GPS أو آباراي ديال حساب المسافات والزوايا ،باش يرسلو إشارات لنقط جيوديزية (point géodésique) أخرى كيكونو في قمم أخرى أو بنايات شاهقة ، أو فصومعة بعض المساجد.
فسنة 2007 تم تجديد قياسات النقطة الجيوديزية ديال توبقال ( toubkal ). وأول نقطة جيوديزية تتسمى مرشيش أو كاينة في النواحي ديال الدار البيضاء وهي النقطة الرئيسية اللي تفرعات منها النقط الاخرى اللي كاينة في المغرب على شكل شبكات.
حاليا فالمغرب كاين أكثر من 8450 نقطة جيوديزية كتغطي أرض المملكة كاملة.
و بهاذ لبلان كانو العديد من الدجالين و النصابة كيستغلوا الأمية و الجهل ديال بعض الناس و كيوهموهم أنهم كيستخرجوا الكنوز، و كانو كيتوجهوا لهاد النقط و كيحفروا حتى كيجبدوا جزء من معدن النحاس، و كيطالبوا بمبالغ خيالية، مقابل يوريو لناس مواقع كنوز أخرى، و هكذا كانو الناس كيسقطوا فالفخ.
كنتمنا هاذ الموضوع يوصل عند أكثر عدد من الناس باش نوعاو بهاد المسألة، و منبقاوش نتعلقو فهاذوك الحديدات لي فالقمم، لأنهم متحطوش عبثيا بل لأغراض جد مهمة، و حنا بسبب عدم معرفتنا بأمرهم، كنكونو سبب فتخريبهم، و كنديرو خدمة لناس أخرين لي كيضطروا أنهم يصعدو و يعاودو يقادوهم.
شكرا جزيييلا للأخ نبيل المهندس فالمجال، لي ساهم بشكل كبير فكتابتي لهاذ الموضوع.
كتابة : لمين عزالدين @lamine.azzeddine ( متسلق هاوي و مدون )
A propos de l'auteur
Commentaires