Bâton de randonnée عصى المشي

Bâton de randonnée أو عصى المشي شي حاجة مهمة جدا أثناء تواجدنا وسط البرية
و فوائدها جمة انحاول نذكر ما تيسر من الإستعملات ديالها.

#1 كتنقص الضغط ديال الوزن على مفاصلنا ( الركبة-الكاحل-العمود الفقري..) أكثرية إلى كان circuit de randonnée لي أضرب طويل.

#2 كتساعدك تشد التوازن ديالك، و كما هو معروف كلما بديتي تعيا كيمشي ليك ليكيليبر و نتا غادي فالجبال و الحافة الله يحفظ متشعرش براسك حتى تسلم على العربي .

#3 كتنقص عليك التعب ديال عضلات أسفل الظهر، أكثرية إلى كنتي هاز صاك تقيل ( هادي ميحس بها غير المجرب)

#4 كتنظم ليك ريتم ديال المشي و هذي بحد ذاتها مهمة جدا، لأنه إلى كان عندك إقاع منظم اتمشي بعيد و متعياش ( غير هيا شوف شكون يرجعك هه).

#5 كتساعدك أنك تجاوز العراقيل لي كتلقى فالطريق ( جدع شجرة، صخرة، ضاية صغيرة..)

#6 مكتخليش ليك يديك و صباعك يتنفخو، حيت كتستعملهم و بالتالي الدم كيدور.

7# كتخليك تأكد من سلامة الطريق ، مثلا الحجر واش شاد بلاصتو الثلج واش غارق واش صحيح، تنقي الطريق قدامك الى كنتي داخل وسط غابة كتيفة…

#8 كتحافظ ليك على استقامة الجسم ( la posture) و هنا خاصك تعرف تريگلها ، ديما خاص الكود ديالك يكون 90 درجة بحال هكدا???? .

#9 تقدر تعاونك باش تصايب ملجئ للحماية بالإستعانة ببطانية النجاة (couverture de survie )

#10 تقدر تستعملها باش تفيكسي شي جزء من الجسم الى تعرض لكسر لقدر الله ( Attelle de fixation) .

#11 تقدر تدافع بيها على راسك إلى خرج ليك شي حيوان .

ثمن الواحدة يتراوح من 60 درهم و نتا طالع على حساب التقل و نوعية المادة المصنوعة منها مثلا الألومنيوم و الكربون أفظل لأنهم أخف و أصلب.
من الأفظل تكون كتجمع .

فالأول اتجيك المشية بيها معنكشة و لكن اتولف من بعد.

فالطلعة تقدر تزيد فالطول و النزلة العكس نقص من الطول.

و نختم بهاد الأية الكريمة، قال تعالىٰ( و ما تلك بيمينك يا موسى قال هي عصاي أتوكأ عليها و أهش بها على غنمي و لي فيها مآرب أخرى) طه :17
صدق الله العظيم