الإنخفاض الحاد لدرجة حرارة الجسم – L’HYPOTHERMIE

كاين لي كيعجبو يدير الغاندو فالبرد و الثلج، و لكن واش عندنا الإستعدادت و المعرفة الكافية باش نتأقلموا مع هاذ الجو و نسافرو فيه، هذا هو السؤال لي خاصنا نطرحوه.

من بين أكبر المشاكل لي نقدرو نطيحو فيها، هي ليبوطيرمي ( hypothermie ), اي ملي كتنزل درجة الجسم لأقل من 35 درجة، و فالحالات الخطيرة تقدر توصل تال 32 درجة. و هنا الى متدخلناش بسرعة نقدرو نوصلو لحالة غيبوبة نقدرو نفقدو فيها المصاب.

يمكن توقع لينا ملي كيتعرض الجسم ديالنا لدرجات حرارة منخفظة لمدة طويلة و هنا الأسباب تختلف.

# يمكن حيث ملبسش مزيان و تمشيتي لمسافات طويلة فالبرد و الثلج.

# أو لأنك لابس مزيان و لكن الكوش الأولى لابسها من القطن،  و هذي خطييييرة جدا، لأنك مكتعرفش السبب ديال نزول درجة حرارة الجسم، بل أنك كلما حاولتي تزيد تسخن الجسم كيتعرق و كيرجع عليك من الداخل بالبرودة، بحال الى شي واحد لابس مزيان و خاشين ليه تيو مور عنقو و كنكبو ليه الماء البارد فظهرو، هنا شحال ما كنتي لابس لن يجدي نفعا.

# أو طحتي فشي بركة مگلاصية.

# أو كثرتي من التوقف فأجواء باردة.

# أو مكليتيش كفاية و بالتالي الجسم مبقاش كيلقى منين يجيب الطاقة باش يحولها لحرارة.

# و كاين بعض الناس لي كايكونو عرضة لهاذ المشكل أكثر من الأخرين، مثلا كبار السن و الأطفال، أو لي كيعانيو من أمراض عندها علاقة بالخلل في النظام الحراري للجسم ( thermo régulation ).

كيفاش نقدرو نعرفو أن شخص دخل فحالة ليبوطيرمي:

– التبوريشة و الرعدة

-التعب المتصاعد

-صعوبة التنفس

– ملي كتقيصو كتلقاه باااارد

-كيولي زرق أو صفر

-مكيبقاش يقدر يدير الحركات الدقيقة، مثلا يمشي بصبعو لعينو نيشان.

– الهديان( يبقا يدوي فشي حاجة معندهاش علاقة باللحظة لي نتوما فيها)

– الهدرة كتقال أو كتمشي

-يقدر يغيب گاع أو يتقطع ليه التنفس و البؤبؤ دالعين كيكبار ( هنا وصل لسطاج دلوحش)

إذن عقلو على هاذ الأعراض و ملي تشوفو البعض منها كاين فعرفو أنها ليبوطيرمي، إذن خاصكم تصرفو.

شنو اديرو؟

# أولا أي واحد كيخرج لغوندوني خاص تكون عندو ( couverture de survie ) راه فايت تكلمنا عليها ( https://zez.euu.temporary.site/.website_9d684985/couverture-de-survie)، كتجبدها و كتغطي بيها المصاب باش تحفظ درجة الحرارة من النزول أكثر.

# كتحاول تخليه فحركة حتى توصلو لشي مكان جاف و دافئ.

# كتحاول تسندو و تقربو ليك باش تشاركو الحرارة ديال جسمك.

# كتحيد ليه الملابس لي فازگة أو باردة و كتلبسو ملابس جديدة ( سيسطيم 3 كوش)

# كتخشيه فصاك دكوشاج إلى كان عندك، أو كتقلب على شي كاشة أو أي شيء ممكن يسخنو.

# عطيه مشروب ساااخن ( اتاي – حليب…) عنداك تعطيه الكحول. و تقدر تعطيه شكلاط، السكر.

# حاول تأكد واش درجة الحرارة كترتفع.

# متحولش تدير ليه تدليك  باش يسخن زعما.

# متخليهش ينعس أو يفقد الوعي ، بقا دوي معاه.

# متحولش تخليه يدوش ديك اللحظة بالماء الساخن.

# فأقرب و قت حاول توصلو لطبيب.

# من بعد ميفوت حالة الخطر من الأفظل الليلة الأولى تفيقو كل زوج ساعات تطمأن عليه.

و كيفما تيقولو الوقاية خير من العلاج.

هنا باش منطيحوش فهاذ المشكل العويص، قبل منخرجو لشي غوندوني خاصنا نعرفو درجة الحرارة و واش كاين الريح و شحال سرعة الريح، و هنا نعرف نلبس، كنأكد على نعرف نلبس ، ماشي نلبس بزااف و صافي، ديما سيسطيم 3 كوش و نقدر نزيد 4 كوش الى كان البرد بزااف، ممنوع منعا كليا الملابس القطنية، ندي معايا المأكولات لعندها سعرات حرارية مرتفعة ( الشكلاط، التمر، اللوز…) ، القفازات يكونو سخاااان ، و السباط دالغوندوني يكون كيحفظ درجة حرارة الرجل.

و ناس لي كيشربو الكحول بعدو من الغوندوني فالجو البارد.

هذشي لي ذكرت فهاذ المقال، راه الى كنتي عارفو، و عملتي بيه تقدر تنقد راسك أو أشخاص أخرين من الموت المحقق .

شاركول المقال لكي تعم الفائدة و إلى موضوع أخر