الجراميق – les guêtres

بالعربية الجراميق ( les guêtres ) هوما واحد زوج جلدات كيتلبسو من تحت الركبة تال فوق الصباط كاين فيهم لي قصار و كاين لي طوال، غالبا تيكونوا مكيدخلوش الماء و خاصهم يكونو كيتنفسو، يعني مكيعرقوش من لداخل، و تيكونو كيلسقو فالصباط بسلك او رباط صلب فالغالب ( كاين بعض الأنواع كيتزيرو غير بلاستيك من لتحت) .

هاد الجراميق مهمين جدا، قراو تال الأخر باش تفهمو الأهمية ديالهم.

أولا كاين واحد الفكرة مغلوطة و هي أن ليگيطر كيتلبسو غير فالثلج و هذا خطأ،لأنهم صالحين فبزاااف دلحالات بلا ثلج.

أولا : كيحميوك من أن رجليك يتنبلو عليك!!!
و التنبال درجلين ( les ampoules ) من أصعب المسائل لي يقدرو يوقعو ليك و نتا شاد الطريق، و من بين الأسباب ديالو هو ارتفاع الرطوبة ديال الأرجل، لهذا رجليك خاصها تكون ديما ناشفة من لداخل، و زيادة على ان الصباط خاصو يكون أمبيرميابل ف les guêtres مكيسمحوش باش يدخل الماء دالمطر او تاع شي حاجة أخرى لداخل الحذاء و هكذا كتحافظ على جفاف القدم.

ثانيا: كينفعو بزززاف ملي كيكون الثلج، حيث كتكون عندك طبقة عااازلة ضد البرودة و مكتسمحش لحبات الثلج أنهم يتسللو ليك لداخل الصباط، و بالتالي كتمشى وسط الثلج و رجليك سخان.
ولو يكون عندك السروال أمبيرميابل فمغديش يحمي ليك سباطك فحال ليگيطر.

ثالثا: كايحفظو ليك على سروالك باش ميتقطعش، حيث فالغوندوني راك كتمشى وسط الحشائش ( جمع حشيش أي العشب اليابس ماشي لكتامية) و أغصان الأشجار و الغيص و ما جاورهما، و بالتالي السروال كيتكرفص مزيان، فهنا les guêtres كتهنا على سروالك.

رابعا : كيحميوك من لسعات الحشرات و الأفاعي السامة حيث كيشكلو درع واقي لأسفل القدم

خامسا: حجرة صغيرة،رملة المهم أي حاجة تقدر تدخل لرجليك و تبرزطك كتهنا منها.

هادو أهم الفوائد ديالهم.

واحد الإشارة مهمة نبغي تردو ليها البال، واحد الخطأ بزاااف منا كيديروه و هي الميكة ملي كنلبسوها ما بين زوج تقاشر ملي كيكون الثلج باش مايفزگوش لينا رجلينا و باش يبقاو سخان، الحقيقة هو أن هاد العملية تثقدر تسبب لينا أضرار صحية للأرجل ديالنا.

حاجة أخرى تقريبا غالبية سراول دلغوندوني فيهم واخد لاستيك لتحت هاداك مهم أنكم تزيروه فوق الصباط باش يزيد يعاونكم ميدخوليكم والو لصباط.

فلهذا الواحد يشري les guêtres ، الثمن ديالهم كيتراوح ماربين 50 درهم تال 800 درهم، موجودين فجوطيات و فمحالات ديال بيع المعدات الجبلية، و ممكن تكومونديوهم من شي سيت على برا.

شاركو المقال مع أصدقائكم حتى تعم الفائدة.

تحياتي